مساء الخير .. أو صباح الخير ... الساعة الآن تشير إلى الثانية عشرة منتصف الليل ... اليوم أدخل عامي الرابع والأربعين ... وبهذا أتشابه مع دولة الرئيس ولكن قد تختلف الأبراج باختلاف الشهور ...

 اختلاف الأبراج بالتأكيد سيؤدي إلى اختلاف بسيط شوي .. مو كثير ..وهو أنه دولة الرئيس من مواليد برج آخر ... ربما نسميه برج العسل والمن والسلوى ، برج الشوكلاته .. برج عمان الغربية ...برج الدوار الرابع "اللي جايب للناس الدور" ... أما برجي فهو برج البصل والثوم ، برج "الشقاوة" برج الغويرية ... وبرج العسكري اللي عاش عمره يحمي الدار من الحرامي ... ولما مات وماتوا أقرانه واصحابه العسكر الشرفاء اكتشفنا انه الحرامية داخل الدار أكثر منهم خارج الدار..

ما علينا ... خلينا نقرا الفنجان ...

في الفنجان اليوم  هناك مجموعة رجال وستات حاملين اقلامهم واوراقهم  وطالعين باتجاه الدوار الرابع ...  من وراهم كميرات وميكروفونات بتمشي على كتاف أشباح ... ما بضحكوا للرغيف السخن ... وهذي طبيعة المصور السياسي... بعكس مصوري الأعراس ومصوري الحفلات ... حيث يكون القسم الثاني من المصورين "مايعين بشكل مو طبيعي" وشعرهم أطول من شعر الصبايا .. وبنقلب حرف "ال-ط- وبصير حرف -ت- ، يعني لو واحد منهم زعل بدل ما يقول "طز" بقول "تز" وبتطلع منه أحلى من العسل، بينما مجموعة المصورين اللي رايحين باتجاه الدوار الرابع ما بعرفوا لا "طز" ولا "تز" وكل اللي حافظينه "حاظر سيدي".

طبعا هي الحالة بتعني أنه ما رايحين ينشروا إلا صور ابتسامات الرئيس وطاقمه الوزاري ، وعلى شان تطلع الصورة طبيعية وحلوة لازم اللي بيتصوروا يفرشوا سنانهم قبل الصورة بمعجون غني بالفلورايد ... ولازم تقدملهم المعجون صبية حلوة مثل اللي بتجيب الدعاية في التلفزيون على شان يحسوا بالطراوة ...

اتفاق الرئيس مع الصحف المحلية كان واضح وصريح ... وعلى شان ما تصير منافسة بنقل الخبر ونشر غسيل بدون "شبه ونيله ومي مغلية " كل الصحف الخاصة رايحة تتقنن بقوانين مستعجلة خاصة سريعة مؤقتة ودائمة بنفس الوقت قبل ما ييجوا النواب الجدد ... حتى لو كانوا النواب موجودين شو اللي بده يصير ...؟!!  "تز ومليون "تز".

طبعاً الجرايد الحكومية رايحة تقدم الأخبار مغسولة بـ"شبة ونيلة ومي مغلية" ، يعني ما فيش نشر للغسيل الوسخ ... واللي عنده خبر مش نظيف رايح يوديه للمواقع اللي بتصدر خارج البلد ، وساعتها سهل على الحكومة تطلع ببيان ناري وتقول "إشاعات مغرضة" تقوم بها جهات خارجية،  وبهيك حالة القوائم السوداء بتكثر وبتغص بأسماء الكتّاب والصحفيين اللي خارج البلد ... يعني هذا سيهيئ الجو لزيادة صحافة "المطاريد" اللي بتسميها الحكومات صحافة صفرا ... وعلى شان ما نكذبهم وحكوماتنا صادقة أصدق من مسيلمة ، حولنا موقع "قضايا عربية" للون برتقالي على أصفر ... وأسود .. لأنه صحافة المطاريد فيها قوائم سوداء ورايحة تنشر أسماء وفضايح وكل شي بخطر على بال اصحابها ...

الشبكة العنكبوتية رايحة تتعرض لزلزال ، وفيه شيخ طالع بفتوى وبقول "إن أوهن البيوت لبيت العنكبوت" كدليل على ضعفها وعدم مصداقيتها ، وبناء عليه رايحة تتسكر كثير من المواقع والصحف الإلكترونية ... وللصراحة يا ريت ، لأنها مواقع تغص بالأخطاء الإملائية والنحوية والكذب والدجل .. قال وشو ... رئيس تحرير ما بقرأ ولا بكتب ... بس بطّلع بعيونه ...

على سيرة الغصة ... في الفنجان صورة مجموعة فئران كبيرة "جرادين" ، وشكلها غاصة ، الله يعين الجرذان في بلدنا ، من جوعها "دقت بأذان العجايز" يعني بلشت تاكل آذان الختيارية والعجزة ، وهي بطبيعتها أكلة جافة ، ربنا يعين الفئران والجرذان على هيك حالة، والله ما بنلومهم ، بس يا ريت الفيران يدقوا باذان الصبايا لأنهن أطرا ومش رايحين يغصوا فيها.

الاشتباكات الأمنية مع المطلوبين واضحة بنص الفنجان ... وهذي مو مشكلة ، خليهم الله لا يقيمهم الحرامية واللصوص وقطاعين الطرق ، لكن فيه حرامية بنص النهار بتسرق وما حدش بواجههم ، وببيعوا بالجملة أراضي وبيوت وشواطئ وحتى بشر ... هذول مبينين في الصورة ولابسين قرفطات حلوة كثير ، بتخبي حقيقتهم، يا ترى مين بده يواجههم ..؟ يمكن يظهر بفنجان جديد ...

فيه صبية كأنها وزيرة والله أعلم  "بحطش بذمتي" ، الإعلام ماسك سيرتها وبقول لازم تستقيل لأنها سمحت بنشر تطاولات على النبي صلى الله عليه وسلم في موقع وزاتها ... الصبية صورتها بالفنجان قاعدة ببركة مية وهذا يعني أنها حاطة ايديها ورجليها بمي باردة ... مدعومة -الله لا يدعم حدا  بباص أو بلدوزر- ...وما حدا رايح يحكي معها شي ... يعني الاستقالة مش واردة ، والصبايا حواليها مبسوطات ، لأنها معاهدة سيداو أعطتهن حقوق كثيرة وحصانات دبلوماسية وحصانات من أزواجهن ، ولأنها الست "سيداو" كرمتهم وما عادوا الستات قاعدات بالبيوت ، وهلا ما شاء الله بزاحموا الرجالة في كل مواقعهم ، وقريباً رايحين نشوف وحدة ست تصلي فينا ويمكن تقرأ "النساء قوامات على الرجال" قال وبشو ... بحلاوتهن ودلعهن وغناجهن .. بدكوا الصحيح معهن حق ، والشيخة إمامنا الجديد رايحة تفتيلنا من قاع الدست مثل ما بقولوا .. يعني ولعت الحكاية ... خصوصاً لما وحدة صحفية طلبت تتجوز أربعة ... إن شاء الله اربع من الجن يجوزوها ويريحونا من هيك نُمر.

الجهة اللي عاليمين من الفنجان ماسحة ، وهذي في العادة فيها أخبار المعارضة ، لهيك يبدو أنها المعارضة طلعت من اللعبة أو أنهم المعارضين بحضروا لانتخابات نيابية من وراء المناسف ، قصدي من وراء الكواليس ، بس اللي بده إياني أنتخبه ، يحضر عطاياه ... أنا زلمة برضاش بكيس طحين ولا صوبة طارق علاء الدين ولا  حتى طبلة أحمد عدوية  وما بخافش من فندق أبو رسول والعمارة الزرقاء ...

ما تستقلوش الأمر ، عندي سبع أصوات ، أنا والمرة والولاد ... وبجوز أمون على عشرين شب وصبية من القراء  في كل منطقة إنتخابية... يعني الشغلة محرزة ... بس ما بظن فيه حدا من المرشحين بقدر يدفع ثمن أصواتنا ....

في الفنجان الجاي بحكيلكوا شو طلباتنا ... بس نتأكد انه المرشحين زلم قد حالهم وعند كلمتهم .... ودمتم بخير مع فنجان قهوة جديد ...